Á lokatónleikum RMM verður leikin óhemjugóð og litrík tónlist. Við heyrum hárbeitta og vægast sagt framúrstefnulega madrígala morðingjans Carlos Gesúaldó kallast á við íróníska bullmadrígala György Ligeti. Thomas Adès lítur með tárin í augunum tæp 400 ár aftur í tímann og „endursemur‟ lútusöng Johns Dowland, Sergei Prokofiev er undir skýrum áhrifum Haydns í kraftmikilli fyrstu sinfóníu sinni. Ljóðaflokkar Ravel og Stravinsky skarta ævintýralega fallegri hljóðfæraskipan, en þó er engin tónlist fegurri en Fjórir síðustu söngvar Richards Strauss, óður til veraldar sem var, saminn þremur árum eftir seinni heimsstyrjöldina.